විපක්ෂ නායක සජිත් ප්‍රේමදාස මහතා සිංගප්පූරුවේ හුන්ඩායි මෝටර් සමූහ නවෝත්පාදන මධ්‍යස්ථානයේ සංචාරයක නිරත වෙයි

කොවිඩ්-19 වසංගතය අවසන් වීමෙන් පසුව 2023 වසරේ දී මෙහෙයුම් ආරම්භ කළ ඩොලර් බිලියන ගණනක ආයෝජනයක් වන සිංගප්පූරුවේ හුන්ඩායි මෝටර් සමූහ නවෝත්පාදන මධ්‍යස්ථානයේ (HMGICS) නිරීක්ෂණ චාරිකාවක නිරත වීමට අද විපක්ෂ නායක සජිත් ප්‍රේමදාස මහතා එක් විය. ඒ මේ දිනවල සිංගප්පූරුවේ සිදු කරන අධ්‍යයන චාරිකාව අතරතුරදී ය. 

අති නවීන පහසුකම් මඟින් පර්යේෂණ සිදු කරන සංවර්ධන මධ්‍යස්ථානයක් වන මෙහි දී විදුලි වාහන නිෂ්පාදන පහසුකම හා රොබෝ තාක්ෂණය සහ කෘත්‍රීම බුද්ධියේ උසස් යෙදුම් EV නිෂ්පාදනය සඳහා පමණක් නොව SMART (සුහුරු) කෘෂිකර්මාන්තය සහ තිරසාර කාර්මික විසඳුම් සඳහා ද භාවිත කරනු ලබයි.

මෙම සංචාරය අතරතුර, හුන්ඩායි මෝටර් සමූහය ඉතා කාර්යක්ෂම, තිරසාර සහ මානව කේන්ද්‍රීය නිෂ්පාදන පරිසර පද්ධතියක් නිර්මාණය කිරීම සඳහා අති නවීන රොබෝ තාක්ෂණය, ස්වයංක්‍රීයකරණය සහ දත්ත මත පදනම් වූ පද්ධති ඒකාබද්ධ කර ඇති ආකාරය විපක්ෂ නායක සජිත් ප්‍රේමදාස මහතා නිරීක්ෂණය කරන ලදී. තිරසාරභාවය, නවෝත්පාදනය සහ SMART පද්ධති කේන්ද්‍ර කර ගත් අනාගත ජීවන සංකල්පවලට සහාය වීම සඳහා තාක්ෂණය උපයෝගී කර ගත හැකි ආකාරය පිළිබඳ නවීන නිරූපණයක් ලෙස මෙම මධ්‍යස්ථානය කටයුතු කරයි. ඒ අනුව විපක්ෂ නායක සජිත් ප්‍රේමදාස මහතා මෙම මුලපිරීම අපූරු ව්‍යවසායක් ලෙස විස්තර කළ අතර, "SMART Sri Lanka" පිළිබඳ ඔහුගේ දැක්මට අනුකූලව, එවැනි ඉදිරි දැක්මක් සහිත ආයෝජන සහ තාක්ෂණය මත පදනම් වූ ආකෘති ක්‍රියාකාරීව ප්‍රවර්ධනය කර දිරිමත් කළ යුතු බවද මෙහිදී  අවධාරණය කළේය. අනාගතයට සූදානම් ප්‍රතිපත්ති සහ දිගුකාලීන ජාතික සංවර්ධන උපාය මාර්ග සකස් කිරීම සඳහා මෙවැනි ගෝලීය හොඳම භාවිතයන්ට නිරාවරණය වීම අත්‍යවශ්‍ය බව ඔහු මෙහිදී සඳහන් කළේය.

වේගයෙන් වෙනස් වන ගෝලීය ආර්ථිකය තුළ නවෝත්පාදන ප්‍රමුඛ පරිසර පද්ධති ඵලදායිතාව, තිරසාරභාවය සහ ඔරොත්තු දීමේ හැකියාව මෙහෙයවන්නේ කෙසේද යන්න අධ්‍යයනය කිරීම සඳහා වූ කරුණු සෙවීමේ මෙහෙයුමක කොටසක් ලෙස මෙම සංචාරය සිදු කිරීමට විපක්ෂ නායක සජිත් ප්‍රේමදාස මහතා කටයුතු කළේය.